يبستان العمر زرعوك شوك وخوف

 والباگوا صفوا ياحيف حراسك 

ناطرتك سنين بعازة متانين 

 ولمتانين طلعوا وسفة مو ناسك 

گعدت وياك اسولف حتى اشوف البيك 

 لگيت الكلشي ماكو واصله الراسك

 ازرعلك ابروحي من الصبر وردات 

 ونته اتهد عليه تفلش ابفاسك

 شجاك تغيرت تتمرجح ابممشاك

 يواهم هذا داسي اولاتظن داسك

 اظل عالي ابمحبتي او الك ساتر شوگ

 وظل اشگف اذا سهم العدو جاسك 

ياتابوت اخرس ياغرور البيك

 تعبر منتشي او موتانه جلاسك

 ماتذكر گلت دنيانه فوت او موت 

 شو مرن علينه او غايب احساسك 

اتنفس هواك ابصفنة النسمات

 ونته تشح على اليهواك بانفاسك 

الشوفك اعتني هودج عرس وافراح

 ليش الگه اعله وجهك ماتم اعراسك

 انه الكاسات وصلك صابر او عطشان 

 ونته المرتوي ابنادي الهجر كاسك

 شوف اشگد فرق بيناتنه انه وياك 

 تحلف بالشماته او احلف ابراسك 

انه واحة محبة او اول الماشين 

 ونته ترد گري ترجع على ساسك