كبرنه عله الهوى وتغير المشهد

ﻻ أسنان ظلت وجهي إتجعد

أحسب بالنزول وألعن الأيام

وأحس هذا العمر من أيدي يتفرهد

أقارن بين أيام الفرح والكيف

وبين إسنين حزني وما ضبطت العد

الحزن يزداد كلما يكثر الشيب

وضحكاتي إشكثر بشفافي  تتجمد

أتوجه إعله وكتي وما لكيت أوتاد

عله شنهي أرتكز ما يمي ظل أحد

مره أشكي النهار ومره أشكي الليل

أبجي الليل كله وبالنهار أسهد

أكابر وأحترك وأشبك بكايه الروح

جروحي توسعن ما يرهم إلهن شد

وجنت دومي أسابك طافحات الخيل

ﻻ تعثر إجدامي وﻻ كدرهن صد

ونه كدامهن جنت أصعد ويه الريح

ﻻ هدمي عتك ﻻ ثوبي يتسرد

ﻻ همني الدرب وأدري المسير طويل

ﻻ امل التعب ﻻ أعجز من الكد

شو هسه ذبلت رافكني حزن الناي

ومن كثر النوايب حته حيلي إنهد

يمته أنسه العذاب وأنسه ليل الضيم

ويمته من القهر كلبي إشوكت يبرد