|
13
يونيو
2020
|
بطّال !!!... الشاعر والاعلامي عبد الامير الديراوي / البصرة
نشر منذ Jun 13 20 am30 07:43 AM - عدد المشاهدات : 429
|
إنتفارگ احسن
من القيل والقال
واريد اوياك اگطع
كل الاحبال
شما احاول اضمك
جوّه بحشاي
تطلعلي بسوالف
موعله البال
يمحبوبي شوكت
تصحه واصافيك
تميل شبيك بين
يمين وشمال
ونه افديتك بروحي
وضوه العينين
وشفتك دوم
صوب الغير ميّال
تشوف النار تلهم
باجي الضلوع
وسهمك جالعدو
ياصاح جتال
ما تدري الزمن
يا منيتي يدور
وتتبدل حبيبي
أحوال وأحوال
ردت طول العمر
تبگه انت وياي
وما ظنيت بيك
تخيب الامال
اهي الايام تكشف
معدن الناس
وغربيل الوكت
هو اصفه غربال
يعزل زينهه من
الدغش والشين
وبس يبگه الردي
وگشور النخال
خلصت السنين
مگالب أوياك
مثل ثعلب
تظل مكّار حيّال
انه شمطلوب حته
اتحمل الصار؟
مو حيلي رگد
وهمومك ثگال
كافي اتمر مرت
ما تسوه الدموع
شطبت اسمك بعد
وإكتبت بطّال