اخر الاخبار
(شنينة ) محللة سياسية !!

(شنينة ) محللة سياسية !!

بقلم :صباح محسن  (كاتب واعلامي)

بعد انقطاع دام لأيام ، وبعد الوعكة الصحية الأخيرة ، مررتُ ، وأنا في طريقي لشراء بعض المستلزمات الخاصة بي ، وبتوجيه من الطبيب ، على بسطية شنينه ، والحق يقال إن المرأة فزت حين رأتني مقبلا باتجاهها ، وتقدمت صوبي ، وهي تضحك دون اسنان ، والسگارة بين اصابعها افاضت بدخان غطى وجهها ، ضحكت بوجهها ، وأنا اقترب منها ، بشكل مباشر ، حينها أطلقت شنينه ضحكة عالية ، ومجلجلة ، اهتزت من هول صوتها جدران الحي الذي تسكنه بالقرب من الشارع العام ، حيث دبيب السيارات والستوتات والتكتك ، والدراجات الهوائية ةالبخارية ، واصوات الباعة القريبة لاصوات مدافع 120 ملم ، وبلا انقطاع ، وبكل صنوف الازعاج..! رغم ان الوقت قارب التاسعة من صباح اليوم ، وقد كانت شنينه لم تراني طيلة فترة انقطاعي عنها ، بسبب حالتي الصحية ، فبادرتني بالقول ، وهنا ابتدأ حديثي معها ، وعلى طريقتها ، والتي تسميها هي ، بالفشگ ، حيث قالت : ها ولك الخربان فگدتك هالايام ، شنهي عرست وانا ما ادري ، لة ولك هجيت ، او ماگلت لحد ، چا ولك انت هم عِزيز ، او الك مچان عدنا ، ها ولك خيرك ، اشصايبك ، شنهي حريشي ، لو طگتك صخونه مال هالوكت ، شو خايب تعال خل احبنك ، چا ولك انت عِزيز عدي ، گتلها ، والله حجية شنينه چنت مالي خلك ، وجعان ، او گضيتها بالمستشفيات ، والادوية ، گالت بصوت أجش ، وينفث دخان ، كون ابعدوينك ، چا هلبت المرض ايطگ المايستاهلون ، والگضوها علينا بس اتمثرد ، او هوبزه ، چا انت چيف خوش وليد ، والوادم تحبك ، گتلها يمعودة شنينه ياوليد ، هو آني عبرت الستين ياوليد بعد ، ضحكت شنينه حيل ، وگالت، خايب انت روحك الزِينه ، چا موش أخير من هذوله الملطلطين ، وبعدين كملّت ، وگالت ، أگلك هسه بعد خالتك خلينا من الصخونه مالتك ، گتلها ، لا والله شنينه مو سالفة صخونة ، بس الضغط معلك ، وشوية تعبني ، گالت خايب ياضغط ، من كون ضغط الضغطهم ، خايب بس اشرب نومي بصره ، وشويه نومي حامض ، وانت إطيب ، تعال ولك سولفلي ، شنهي اخبار الربع الحرامية ، وين وصل بيهم الدهر ، واضافت ، كون طرهم الدهر ، ولك احچيلي ، گتلها ، والله شنينه هالايام آني منگطع عن الاخبار ، وما اعرف شكو ماكو ، ضحكت ، وگالت ول ياعيار ، كلش گاطع النفس ، ولا تعاين على التلفزيون ، او محد ايگلك شكو ماكو ، گتلها لا ماعندي خلگ ، گالت ، چا خوش آنا اسولفلك ، خايب چا موش المدعبل ، وتقصد العبادي ، راح يروح للكويت ، او هو ماعنده فليسات ، گتلها تقصدين مسالة الميزانية اللي متعطله يم النواب ، گالت اي ولك ، چا موش راح يصير هو وربعه مضحچه للاجانب ، او حتى الكويتيين يضحكون علينا وعليه ، بس ماگتلي ولك ، عود لِيش الشسمه الا يم الكويت ، چا ادري ماكو غير مچان الا عد هذوله اللي ماراح ينسون دشتنا الهم ، هزيت راسي وگتلها اعتقد اكو اتفاق على ان يكون المؤتمر بالكويت ، وما اعرف شنو السبب ، ضحكت ، او ورثت جگارة ، والتفتت عليّ وگالت ، أگلك ، يگولون الامريكان طگو ربعك بوري امعدل ، من حيث ماراح يلاعبون ايديهم بشچم فلس ، او طلعت سالفتهم بوخة ، ويگولون العراگ زنگين ، او فلوس چثيرة ، بس الحرامية هواي ، او كل واحد منهم امفتح مصرف بسم عشيرته واخوته ، والنوب الوادم الجاية للكويت كلشي ما راح يطلع منها خايب ، لأن يگلك هم خايفين على فليساتهم لا تروح ابطن الربع اللي نهبوا العراگ ، ويگلك خيرهم ماراح يدفع غير اشچم فلس ، والباغي يم هذا ابو صماخ ريس المتحده ، شسمه ولك هذا اللي اجا ورا الاسود ، گتلها تقصدين صندوق الامم المتحدة ، حتى يراقبون شلون تنصرف الفلوس على الاعمار ، ضحت حيل ، وگالت ، خايب اشمالك اطبل صفح ، ولك ياصندوك يا امم متحدة ، ولك هم الحرامية اللي عدنا يعرفون صندوك لو امم متحدة..! عبالي بعدك فاهم ، بس چن الصخونة امضيعة صول اچعابك…چا ولك انت ماسمعت حتى هذا اليرعش ابو الكهربه طلع حرامي من الزينين ، او طلع بايعنه شلع ، مدري المن ، وبو النفط لليوم ايدور على غازات ايحرك بيها نفطاتنا ، والنوب عدك هاي المره السمينه كلش ، ام الصحة ، چا موش سوت المستشفيات عبالك عيادة مال دختور مايعرف الله ولا عگوباته ، او كلشي صاير بفلوس ، حتى اهل الزبايل يومية كاضينه الباب ويردون فليسات على مود چيس اسود مال وصخ ، او فوگها المدعبل ايگص ابرواتب المساچين اليشتغلون بالحكومة ، او هو مايدري بالحرب انتهت ، او حاطلة وين المعتور ايدولبون بيه ، گص هذا ، واكطع من ذاك ، او لهوگووه او هو بلا راي ، اگلك بعد شتريد اسولفلك ، على الماي اللي راح ايصير گطره ابگطره مي هذولة اهل المسلسلات الطويلة ، لو احچيلك على البصرة اللي مسويه عرس مال حچي او هي متروسه وصخ ، او طگ التفگ لليوم ما انگطع ، أگلك شو چنك مستغرب ، ها خاف انت صدك مصخن…..عفتها ، بالگوه ، وآني اشعر راسي راح يطگ وهرولت باتجاه الصيدلية ، وهي تصيح وراي ، ها ولك شو طفرت الغم ، چا بعد عدي هواي سوالف خايب شمالك المهروم ، ولك انت صدك مصخن ، وصاحت بصوت عالي المستوى ، عود ولك اتغطى زِين من تنام ، حتى لاتتكشف ، ويطلع…..

عن Resan